Wa gyuy hulip ni Jojo

Hangtud karon pabiling blangko ug wala pay mi-asumer nga mga opisyal nga gitudlo ni Mayor Tomas Osmeña sa mga gibiya-ang posisyon sa gipusil patay nga program director sa Bantay Dagat ug market administrator sa siyudad Elpedio "Jojo" dela Victoria Jr.

Giangkon sa mayor nga wala niya pursigiha si kanhi konsehal George Rama nga modesisyon na kun iya bang dawaton ang bakanting posisyon isip market administrator.

Giangkon sa mayor nga iya usab nga gihatagan og konsiderasiyon ang kahimtang sa panglawas sa kanhi konsehal.

Matud sa mayor wala pa siyay napiliang opisyal nga haum modumala isip market administrator sa higayon nga balibaran ni Rama ang maong tanyag.

Hinuon masaligon si Osmeña nga dawaton ni Atty. Allan Gaviola ang posisyon alang sa pagpadayon sa programa sa market denial batok niadtong mga isda nga nakuha gikan sa mga ilegal nga panagat.

Gibahin sa tulo ka mga opisyal ang tulo ka mga posisyon nga gihuptan ang tanan kaniadto ni dela Victoria nga gihulagway nga usa ka ma-abtik, seryoso ug isog nga mipatuman sa tanan niyang mga gimbuhaton. - Darrel A. Carumba Guardians meet sa E. Visayas tambungan ni Gringo Honasan Ni Wen Celen

Tacloban City - Usa ka dakong panagtagbo ang gitakdang ipahigayon sa mga miyembro sa Philippine Guardians Brotherhood Incorporated sa Eastern Visayas nga tambungan ni kanhi Senador Gregorio "Gringo" Honasan.

Apan matud pa ni Salvador dela Paz, Regional President sa Guardian nga kon dili makatambong si Honasan, dili gihapon mahinayon ang maong asembliya.

Gani karon na unta kining sunod semana, apan gikanselar sa kapin 10,000 ka miyembro sa Guardian ang maong tigom tungod kay nasayod sila nga di gyud makatambong si Honasan.

Hinuon gipaabot nila nga makahigayon ra gihapon si Honasan sa pagtambong niini busa wa sila kawad-i og paglaum nga mahinayon gyud ang maong asembliya sa dili madugay.

Matud pa ni dela Paz nga nagpabilin nilang giila nga lider gihapon nila si Honasan bisan pa kon kini nagtagotago karon gumikan sa kasong iyang giatubang nga may labot sa giingong pagkalambigit niya sa milabay'ng kudeta.