SK councilor gikulata sa 4 polis

Mopasaka og sumong kriminal ug administratiba sa Ombudsman Visayas ang usa ka konsehal sa Sangguniang Kabataan batok sa upat ka polis sa Alcantara, Sugbo kabahin sa pagpangulata sa giingong hubog nga nagpatrolya ug wala pa gayud mag-uniporme nga polis niadtong Sabado sa alas 10 sa gabii sa merkado publiko ning lungsod.

Ang nalambigit nga mga polis nga gireklamo mao sila si SPO2 Jesus Ascencion, SPO1 Artemio Cababat, PO2 Candido Sacnanas ug PO1 Wilfredo Ando, pulos nadestino sa Moalboal Police Station.

Si SK councilor Jan Michael Vincent Jemina, 21, ulitawo, nga taga Poblacion ning lungsod miasoy nga samtang diha sila sa duol sa merkado publiko uban sa iyang mga higala nag-estambay, kalit lang niabot ang grupo ni SPO1 Ascencion nagpatrolya uban sa iyang mga kauban sakay sa patrol car aron sa pagbadlong sa mga minor de edad nga maglaroylaroy panahon sa kagabhion. Ang Alcantara adunay curfew gikan sa alas 10 sa gabii.

Matud ni Jimena nga aduna siyay naluwatan nga pulong nga "laga-laa-a" apan nadunggan kini sa mga polis, kalit lang kining giduol nila ni Cababat, Sacnanas, ug Ando.

Gibutyag ni Jimena nga gipatiran siya ug wala pa gayud matagbaw gitabangan og kulata sa tulo ka mga polis, hinungdan nga nakahiagom siya og grabeng bun-og sa iyang kalawasan.

"Nangayo ko og pasaylo nila, sorry sarge wala to nako tuyoa," matud niya ning tigbalita.

Human sa maong pagpangulata gidala si Jimena sa police station ug gipriso og usa ka gabii.



Ang mga kabanay ni Jimena ug mga higala nagpanon ngadto sa presinto aron kondenahon ang binuhatan sa maong mga polis, ug ang hepe na ang nagpagawas sa selda ni Jimena.

Si SPO3 Abec Cultura, deputy chief sa Alcantara police station sa pakighinabi sa Banat News miingon nga alegasyon ra kana ni Jimena batok sa iyang kaubanan ug kinahanglan nga maaprobahan kini kun ugaling aduna siyay mga testigos nga nagpamatuod sa iyang pasangil.

Matud pa ni Cultura ang mga polis pa gani magpatrolya, yaga-yagaan lang sa mga batan-on, singgit singgitan nga dakpa ko Sir."

Sumala ni Cultura nga dili kini mga boluyagon ang upat ka mga polis, tarong ug matinud-anon sa ilang serbisyo.