Gubot sa politika mosamot kun...

Gibati og kabalaka ang mga lokal nga opisyal sa siyudad sa Sugbo nga mosamot ang kagubot sa politika sa nasud kon dili mapangitaan og solusyon ang gipaabot nga negatibong epekto niining nag-ung-ong nga sunodsunod pang mga pag-umento sa presyo sa mga produktong petrolyo.

Gumikan niini mopasar og resolusyon si Konsehal Arsenio Pacaña atol sa sesyon sa konseho sunod semana nga nagpahimangno kang Presidente Gloria Arroyo pag-atiman niining maong problema.

Mipadayag og suporta ang konsehal sa gidemanda karon sa mga magpapatigayon, transport group ug sa mga mamumuo nga naghagit sa gobyerno nga tun-an ang posibilidad nga pagkanselar sa 12 porsiyento nga VAT batok sa mga produktong petrolyo. Ang lain alternatibo niini mao ang pagtangtang sa taripa niadtong mga gipang-import nga petroleum products.

Pagkakaron miabot na og $75.35 dolyares ang presyo sa matag barel sa lana didto sa kalibutanong merkado.

Una nang gipadayag sa mga kompaniya sa lana nga mopatuman sila og matag semana nga umento sa presyo sa produktong petrolyo sa tag P50 sentabos hangtod sa bulan sa Hunyo aron dili kaayo makalitan ang publiko sa epekto niini.

Nunot niini gipaboran usab ni Pacaña ang sugyot sa mga eksperto alang sa posibling pagsagop sa mga gituohang alternative sources sa enerhiya sama pananglit sa coco-biodiesel, ethanol o ba kaha ang compressed natural gas.