Carcar andam na ma-siyudad

Andam na ang lungsod sa Carcar nga mahimong siyudad tungod sa gituohang pagsulbong sa ekonomiya niini duyog niining pag-abli sa sistema sa irigasyon alang sa mga mag-uuma sa lungsod.

Si Mayor Patrick Barcenas nagkanayon nga daan nang nagbansiwag ang kauswagan sa Carcar gikan sa naandang industriya niini sa sapatos, chicharon ug uban pang produkto sa panginabuhi sa mga molupyo.

Apan karong may sistema na sa irigasyon ang mga mag-uuma, labi pang molipang ang kinitaan sa lungsod, matud pa ni Barcenas.

Gisubhan ni Pangulo Gloria Macapagal Arroyo ang Can-asujan Small Reservoir Irrigation Project (CSRIP) niadtong Huwebes nga maoy moapod-apod og tubig sa kapin 800 ektaryas nga kaumahan sa lungsod.

Matud pa ni Barcenas nga may 13 ka barangay ang makapahimulos ning maong proyekto.

Niini, 400 kapin ka ektarya ang alang sa mga utanon, 300 kapin ang alang sa kahumayan, samtang 100 kapin ang alang sa sweet corn.

Apan matud pa ni Barcenas nga mosamot pa kadaghan ang mga kaumahan unya kay daghan nang masibot sa pagsagop sa tubig gikan ning maong proyekto ilabi na kon magsugod na kini sa iyang kalihokan.



Sa pagkakaron ang mga mag-uuma lamang nga nagpasakop sa kapunungan sa mga "rice ug vegetable farmers" ang nakuwenta nga makagamit ning maong tubig gikan sa CSRIP.

Kasagaran kanila mao kadtong mga sakop sa gitawag nga "farmer scientists" nga grupo.

Mao kini ang mga mag-uuma nga nabansay pag-ayo sa pagpanguma og humay ug utanon ug ingon man sa mais.

Ang pagkasibot sa uban pang mga mag-uuma ilabi na karong anaa nay irigasyon, nagtuo si Barcenas nga labi pang modaghan ang mga mag-uuma nga makapauswag sa ilang produksyon sa umaabot nga mga adlaw.

Sa pagkakaron giandam sa kagamhanan ang mga "seedlings" ug abuno nga ipautang ngadto sa mga mag-uuma aron nga makasugod na sila sa ilang pagpananom og humay, utanon ug mais diha sa ilang kaumahan uban sa tubig nga isuplay sa CSRIP.