2 patay sa vigilante

Duha ang patay samtang laing usa ang naangol sa managlahing pagpamusil nga gidudahang binuhatan sa mga gidudahang vigilante nga nag-operate na usab sa mga kalungsuran.

Niadtong miaging adlaw sa sitio Canliso sa barangay Suwa nga nahimutang 12 ka kilometro sa Poblacion sa lungod sa Argao kasamtangang dunay tigbakay nga gipahigayon dihang kalit nga gipusil si Patronilo Albaran alyas Boy, 40 anyos, minyo, habal-habal driver ug ang naangol mao si Eduardo Zamora, hingkod ang panuigon nga nagpuyo sa barangay Hampang sa nahisgotang lungsod.

Si PO3 Elias Pelayo sa kapolisan sa nahisgotang lungsod nga gikahinabi sa Banat News ang miingon nga nagtan-aw sa naghantak ang mga biktima dihang kalit mitumaw ang mamumuno ug namusil.

Dugang pa niya nga si Albaran nga nahagba sa yuta ang giduol pa gayod sa mamumuno ug gipusil ang ulo sa makaduha gayod ka higayon nga maoy nakaingon sa kamatayon niini.

Sa crime scene nga nahagbaan sa biktima maoy napalgan nila ni PO3 Pelayo ang mga kabhang sa armas nga kalibre 45.

Si PO3 Pelayo miingon nga ang ilang pagtuo nga naangin lamang ang ikaduhang biktima nga si Zamora sanglit si Albaran maoy tuyo sa mamumuno kay mao man ang gitiwasan sa pagpusil bisan nahagba na sa yuta.

Human sa pagpusil sa mamumuno sa biktima daw yano lamang usab kining milakaw pahilayo nga daw sama sa pamaagi sa mga vigilante.

Gitug-an ni PO3 Pelayo sa Banat News nga ang namatay ang nag-atubang na og kaso nga carnapping ug sa ilang nahinumdoman nga mga napulo na katuig ang nakalabay kini ang nabilanggo sa Talisay.

Samtang patay usab ang usa ka Geronimo Papaya, minyo molupyo sa barangay Tagbubunga sa lungsod sa Asturias human kini pusila sa wala mailhing tawo nga giingong "Hilonggo" ang pinulungan.

Ang biktima gipusil atubangan sa iyang pamilya niadtong Domingo sa hapon ug gisusi na ang hinungdan ug motibo sa pagpatay.