2 ka pumpboat nga armado midagsa

Naalarma ang kapolisan sa lungsod sa Asturias niadtong Martes sa gabii human makadawat og impormasyon si Mayor Letty Orosco nga adunay presensiya sa armadong mga tawo nga nagsakay og duha ka pumpboat nga midunggo daplin sa baybayon sa Sitio Gibabasan, Barangay Tubigag-Manok ning lungsod.

Daling miresponde ang kapolisan ning lungsod pasado alas 6 sa kagabhion pinangulohan ni SPO2 Tedeneco Kiamco ug mga kaubanan niini sa pag-adto sa maong dapit.

Matud pa ni Kiamco nga nahinabi sa Banat News nga sa dihang ilang gisusi ang maong lugar, ilang naabtan ang duha ka pumpboat diha sa baybayon. Ang usa niini adunay sakay nga napulo ka mga tawo, naglakip sa unom ka mga bata, upat ka dagko, duha ka babaye, ug duha ka mga lalaki.

Gituohan ni Kiamco nga managtiayon ang sakay niini sanglit adunay mga bata nga sakay sa maong pumpboat.

Sumala niya nga sa ilang gihimo nga pakisusi, naggikan pa sa lungsod sa Victorias Negros Occidental ug paingon sa Ubay Bohol ang maong mga armadong tawo.

Midugang siya nga wala niya gisalikway ang pagduda tungod kay imposible kaayo nga mapunta sa maong dapit nga unta paingon man sila sa Ubay Bohol.

Gihulagway usab ni Kiamco nga ang maong barangay sa Tubigag Manok maoy lugar nga kasagaran sa ilang pagpatrolya panahon sa gabii, gumikan kay kanunay silang makadawat og mga taho nga adunay mga armadong tawo nga masigpatan sa mga lumolupyo.