Andales milingkod isip OIC sa ABC

Pormal nga miasumer si Pahina Central barangay captain Sisenio Andales isip acting president sa Association of Barangay Council (ABC) sa siyudad sa Sugbo.

Kini human sa gipahigayong oathtaking niini didto gyud mismo sa buhatan ni Mayor Tomas Osmeña nga gitambungan sa ubang mga sakop sa board nga miasumer na og balik sa katungdanan human gilibkas sa Sandiganbayan ang 90 ka adlaw nga preventive suspension batok kanila may labot sa kasong gipasaka sa gitaktak nga project engineer sa ABC nga si Leah Rondez.

Matud ni Osmeña si Faelnar maoy dili mosugot nga mo-asumer og balik isip presidente sa liga gumikan kay tuyo niini nga tiwason na lang niya ang 90 ka adlaw nga preventive suspension.

Matud sa mayor nabalaka si Faelnar nga posibling ipadayon gihapon sa pagpatuman ang maong suspension order sa higayon nga isalikway sa Sandiganbayan ang giduso nila nga motion for reconsideration.

Nasayran nga sayo ning bulana miluwat og direktiba ang Sandiganbayan nga nagmando sa mayor paglibkas sa maong suspension order samtang wala pa maresolbar ang giduso niining mosyon nga maoy hinungdan nga napugos og turnover og balik ngadto sa mga ni-asumir og balik nga mga opisyal sa liga si kanhi acting ABC president Rodulfo Estella.