Kota sa video karera iduso sa Mandaue

Ang paghatag og kota sa mga hepe sa matag presinto sa madakpan nga mga video karera machine, masiao ug uban pang ilegal nga sugal maoy nalakip sa mga pamaagi nga pagahimoon ni Senior Superintendent Eduardo Catabas sa kapolisan sa dakbayan sa Mandaue.

Si Catabas nga gitangtang niadtong Abril 3 niining tuiga ni PNP Chief Director Arturo Lomibao dihang naigo kini sa "three strike policy" sa PNP nahibalik na kini nga direktor sa Mandaue City Police Office.

Si Police Regional Office 7 Director Chief Supt. Edgardo Gador miluwat og kamanduan niadtong Abril 24 niining tuiga alang sa pagpabalik kang Catabas sa pagpangulo sa kapolisan sa dakbayan sa Mandaue. Kini human ang Regional Intelligence and Invetigation Division (RIID-7) nga nag-nag-imbestigar ni Catabas mi-absuwelto niya.

Sumala sa imbestigasyon nga si Catabas mipatuman sa mga pamaagi pagsumpo sa mga ilegal nga sugal sa maong dakbayan.

Kahinumdoman nga ang kalit nga pagtangtang kang Catabas nga direktor sa kapolisan sa maong dakbayan gikahisagmuyo kaayo ni Mayor Thadeo Ouano. Gitataw ni Ouano nga nakaapekto sa pagplano sa seguridad alang sa ASEAN summit ang pagkarelibo ni Catabas.