Anti-drug covenant sa Talisay walay mipirma

Nagpaminte sa kapungot si Kapitan Juanita Mabala sa barangay Tangke, Talisay City dihang sa 10 ka mga "drug pusher" sa Tangke nga gipatawag alang sa usa ka pinirmahay sa "covenant" kun kasabutan didto sa Talisay City Hall niadtong Martes wala gyuy bisan usa nga mitunga.

Apan bisan pa niini mihatag pa gihapon si Mabala og higayon sa mga negosyanteg shabu ug uban pang matang sa ilegal nga drugas sa iyang barangay.

Kini pinaagi sa pagpatambong kanila sa umaabot nga drug symposium nga anha gyud ipahigayon sa Tangke.

Ang rason nga wala manunga ang mga hingtungdan didto sa City Hall, mao ang kahadlok niini nga sila idiretso lang pagpaslak sa prisohan sa kapolisan.

Gipasabot ni Mabala nga dili magbinuang ang mga tinugyanan sa kapolisan ug Philippine Drug Enforcement Administration (PDEA).

Ang tinguha sa maong panagtagbo uban ni Mayor Socrates Fernandez, ug uban pang opisyal sa kagamhanan sa dakbayan sa Talisay, mao nga magkasinabtanay sila kauban ang mga negosyanteg ilegal nga drugas nga tabangan nila ang kampanya paghimo sa Talisay nga usa ka "drug free city".

Tungod sa kapakyas nila pagtambong, si Mabala nagkanayon nga dili na sila magmahay sa mga otoridad kon higpitan na niini ang paggukod kanila.

May katahap usab si Mabala nga dili gihapon moundang sa ilegal nga pamatigayon ang maong mga drug pusher tungod kay wa kini plano sa paghunong sa ilang ilegal nga pamatigayon.