Ang maong lungsod dunay firetruck apan walay mga bombero nga mag-operate niini gawas lang sa mga volunteer ug mga sakop sa kapolisan.
Niadtong tungura matud pa ni PO2 Peter Cuanso ang nag-inusarang trak sa bombero wala pay sulod nga tubig gumikan kay gigamit kini sa munisipyo pagpamisbis sa mga pananom gumikan usab sa umaabot nga pista karong Mayo 3 ug 4.
Samtang ang yawe usab niini wala dayon mahibaw-i kung hain nabutang sanglit laing tawo maoy gadala-dala niini ug diha kini gibutang sa motorpool sa lungsod imbes nga diha sa ilang police station.
Nadawat ang alarma sa sunog sa kabomberohan sa Toledo City alas 6:45 ang takna ug nakontrolar sulod lang sa 20 minutos.
Ang naugdaw nga panimalay gipanag-iya ni Milagros Clarisan ; samtang nadanyos usab ang balay nila ni Engineer Potenciano Gentapa ug balay sa Provincial Environment Natural Resources Office sa lalawigan nga si Glenn Baricuatro.
Atol sa maong sunog naangol usab ang amahan nga didto sa ika duhang andana nga miluwas sa iyang pito ka buwang anak nga lalaki ug nakaangkon ug mga paso sa ilang kalawasan mao si Natanuel Alexis Lao, ang amahan sa bata nga si Samsom, 30 anyos, ug ang bomberong si Silvestre Tero sakop sa Toledo Fire Department gumikan sa pagkapaso atol sa sunog.
Si SPO2 Delicio Esconde sa Pinamungahan Police Station nga niasoy sa Banat News nga nagsugod ang kayo sa luyong bahin sa balay ni Milagros diin adunay nipakang electric wiring.
Si Toledo City Fire Marshall, Inspector Randy Mendaros nga gikahinabi usab sa Banat News, matud niya tulo ka mga lungsod ang daling miresponde naglakip sa Balamban, Toledo ug Barili nga nipadala og tag duha ka mga dagkong tangke sa fire truck.
Matud pa niya nga wala makatabang ang fire truck sa Pinamungahan tungod kay ang yawe gidala sa usa ka sibilyan ug walay nakahibalo kon si kinsa nga tawo ang nagdala sa yawe.
Nidugang siya nga sa ilang gihimo usab nga imbestigasyon, mokabat lang sa 3.5 milyones danyos sa maong sunog, kini naglakip sa mga mahalon mga butang, ug alahas nga naapil paglamoy sa kalayo. - Uban sa taho Rey Pasaporte