Tungod sa limos, maguwang gipatay

Namatay ang maguwang nga lalaki human gipusil sa iyang kaugalingong manghod kagahapon sa kaadlawon ala 1:30 ang takna sa ilang panimalay sa Barangay Tinaan, Naga.

Ang namatay giila sa kapolisan mao si Fernando Paunil, 37, ulitawo, samtang gitumbok nga mipusil mao ang iyang manghod nga si Clyde 25, ulitawo ang nanimuyo sa naasoy'ng lugar.

Sa gihimong imbestigasyon pinaagi ni PO3 Romeo Balano sa Naga Police Station nasayran sa Banat News nga nagkalalis ang biktima ug ang suspek nga si Clyde kabahin sa limos sa iyang inahan nga namatay.

Gibutyag ni Balano nga nilakaw si Clyde human sa ilang panaglalis, apan nibalik kini og nagdala na og armas sa wala pa matino sa kalibre, dayong pusil sa iyang maguwang nga nagtalikod, ka usa ka higayon, nga miresulta sa kamatayon niini.