Pautang alang sa mga kabus

Gipangitaan karon og paagi sa kagamhanan sa dakbayan sa Sugbo nga makapahimulos ang mga kabus nga mag-uuma ug mga mananagat dinhi sa Sugbo sa sayon nga paghulam og kwarta aron magamit pagpalambo sa ilang ginagmay'ng kapanginabuhi-an.

Si konsehal Edgardo Labella tsirman sa committee on laws sa konseho sa dakbayan maoy nangamahan sa resolosyon alang niining maong katuyo-an.

Tumong sa maong resolusyon mao ang pag-awhag sa Government Financial Institutions (GFIs) ug sa mga pribadong bangko nga mahatagan og oportunidad ang mga gagmay'ng mananagat ug ang mga kabus nga mag-uuma.

Subay sa gihimong pagtuon sa banking sector sa nasud nga gipublikar sa Agriculture Credit Policy Council (ACPC) nga ang panginahanglan sa sektor sa agrikultura gibana banang moabot og P500 bilyones matag tuig apan ang matubag niini sa hingtungdang ahensiya mokabat lang sa P300 bilyones.

Gumikan niini 40 porsyento sa maong mga ginagmay'ng mag-uuma ang mapugos og dangop sa mga non-formal loan sources nga dunay tag-as kaayo og interes sama sa five six.

Aron makurihi-an kining maong problema nakahukom si Labella nga mopalabang ning maong resolusyon aron kapangita-an kini og paagi nga masulbad.