Direktor sa tambalanan gipetisyonang mataktak

Gipetisyonang hepe sa Eversly Child Sanitarium sa Jagobiao, siyudad sa Mandaue ang gilaumang matangtang na sa katungdanan tungod sa mga nahimo niining kalapasan.

Ang gipetisyonang hepe sa maong tambalanan mao si Dr. Gerardo Aquino ug maoy gitinguhang ipuli sa paghupot sa biyaan niining posisyon mao si Dr. Joani Riveral.

Ang misang-at og petisyon kang Dr. Aquino mao ang mga sakop sa Community Residence Association of Jagobiao, (outside) ECS Compound, Business Sector, Academe Sector, Labor Sector, Religious Sector, NGOs, Patient's Council, ECS Residence, Barangay Council, Parents Voluntary Organization, Urban Poor Grass Roots Organization ang nagkauyon gayod sa ilang tinguha.

Ang mao nilang reklamo ang ilang giduso ngadto sa mga buhatan nga ilang gituohang makatabang kanila sa paghatag og pagtagad sa ilang mga reklamo nga naglakip na sa Ombudsman Visayas.

Nunot usab ilang gihangyo si Mayor Thadeo Ouano pinaagi kang Jagobiao Barangay Captain Loquias sa pagtabang kanila sa pagduso sa ilang reklamo sa kadagkoan sa Department of Health.

Base sa ilang reklamo maoy ilang gipasabot nga daghan kaayo og mga gihimo si Dr. Aquino nga mga kalapasan nga naglakip sa dili makiangayong pagtagad sa mga pasyente ug walay pagpakabana sa gipatumang kalimpiyo niini.

Ang Ombudsman Visayas nga nalakip usab sa ilang gipadangatan sa reklamo ang nakahimo na usab og pakisusi ug nakita gayod ang daghang kalapasan nga maoy nakahagit kanila sa paghingusog niini.

Gisuwayan og tawag sa Banat News ang gireklamong doktor apan dili kini makontak diha sa ilang buhatan.