Transport Strike

Dunay nag-ungot karong planong paglusad og halapad nga magsunod - sunod nga welga ug transport strikes sa mosunod nga mga adlaw gumikan niining subling pagsaka sa presyo sa lana sa kalibutanong merkado.

Kagahapon mipatuman sa dugang usbaw sa presyo sa ilang produkto ang mga higanteng oil suppliers dinhi sa nasud ug gipaabot pa nga mosaka na usab kini gumikan sa padayong pag-initay sa nasud sa Estados Unidos ug sa Iran.

Ang mga dagkong pundok sa transport groups sa kauluhan nagpahibalo nang molusad og daghang transport strike matag semana samtang duna na say nagpadayag nga pausbawan ang pletihan.

Kagahapon si Nagkahiusang Drayber sa Sugbu president, Antonio Pogado sa pakighinabi sa Banat News nagkanayon nga ila unang iduso ang ilang natanggong nga petisyong patas nga singil sa pletihan nga P7.50 sa unang lima ka kilometro ug dugang piso matag mosunod nga kilometro.

Plano sa NADSU nga iduso ang petisyon karong semanaha gumikan niining nagsaka na usab nga presyo sa petrolyo. Ang 7,000 ka sakop sa NADSU matud pa ni Pogado wala mopugos og sang-at sa ilang petisyon sa milabay'ng tuig gumikan sa pag-rollback sa presyo niadtong bulan sa Nobiyembre ug Disyembre.

Apan mipadayag si Pogado nga kun di tugutan ang ilang petisyong patas nga singil, mapugos sila og sanong sa panawagan sa Piston sa kauluhan sa paglusad usab og susamang welga dinhi.

Sa pagkakaron buot nga unahon ni Pogado ang mga lokal nga isyu sa trapiko sama sa gipangayong gahum sa CITOM nga makakumpiska og lisensya bisan walay temporary operators permit nga ihatag.

Samtang ang mga bus operators diha sa habagatang bahin sa dakbayan pinanguluhan ni Nick Villahermosa mipahibalong ila ng ipatuman ang Piso matag kilometro sa pletihan sa bus.

Matud pa ni Villahermosa nga susama sa rason sa Nadsu sa ilang petisyon wala nila mapatuman ang gitugutang Piso matag kilometro niadtong milabayng tuig gumikan usab sa pag-rollback apan karong mimahal pag-usab ang lana ug piyesa ila na gyu kining ipatuman.

Gikatakdang mamilit og notisya karong sunod semana ang tanang bus operators sa ilang mga unit aron mapahibalo ang publiko sa ilang tinguha.

Kagahapon si Presidential chief of staff Michael Defensor mipahibalong paluyuhan sa Malacañang ang bisan unsang lakang sa Kongreso aron maapil sa exemption sa 12 porsiyentong VAT ang petrolyo.