Public hearing sa C.O. 801 gitinguha

Usa ka public hearing ang giplanuhang ipahigayon aron madungog ang isyu kabahin sa gahum nga gipangayo sa City Traffic Office Management (Citom) nga amendahan ang kasamtangang traffic code sa dakbayan aron mahimo ng mokumpiskar ang mga traffic enforcers og lisensya sa mga drayber bisag walay ihatag nga temporary operator's permit (TOP).

Ang committee on laws, ordinance, public accountability and good government pinanguluhan ni konsehal Edgardo Labella, mipadayag nga iyang suportahan ang giplanong public hearing.

Matud pa ni Labella nga importanteng dunay public hearing nga himuon sanglit ang City Ordinance No.801 kun "Ordinance Establishing a Traffic Code for the City of Cebu," mahimo mang amendahan, midugang siya nga ang matag balaudnong gitinguhang pandayon sa mga lokal nga kagamhanan kinahanglang dili magkasumpaki sa mga guidelines nga gitahas diha sa ubang ahensya sa gobiyerno sama sa Philippine National Police ug Land Transportation Office diin diha sa public hearing mahimong matuki.

Sagad sa malapasong drayber hatagan lang og citation tickets ug dili mokumpiska ang mga enforcers sa mga lisensya gumikan kay wala sila hatagi og gahum sa LTO paghimo niini.

Ang Nagkahiusang Drayber sa Sugbu (NADSU) , usa sa mga dakong transport group dinhi sa Metro Cebu daan ng mipadayag og pagsupak sa plano sa Citom.

Si Anthony Pogado ang presidente sa NADSU daan ng mipadayag nga ang citation tickets nga i-isyu sa Citom dili ilhon sa mga organic sa LTO sanglit ang citation diha ra mosaler sa lokal nga hurisdiksyon, gawas sa dakbayan sa Sugbu dili na kini mahimong ilhon.