Ang usa sa mga apo ni Eulogia Cabalda nga si Belinda Cabalda ang nanag-iya sa 11,888 metro kwadrado nga pribadong luna nga gihimong sam-ang karun diha sa A. Lopez ang mipresentar sa mga dokumento sama sa titulo nga magpamatuod nga sila maoy nanag-iya sa luna ug walay katungod ang barangay nga maoy modumala niini.
Apan giinsister ni Labangon barangay captain Felix Abella nga ang barangay mao na karoy adunay katungod nga modumala sa maong sementeryo tungod sa gihatag nga pagtugot sa siyudad nga pinirmahan gyud mismo ni Mayor Tomas Osmeña niadtong milabay'ng bulan.
Gani pagkakaron mitugot na ang barangay Labangon nga dunay malubong diha sa maong sam-ang ug bugtong gikinahanglan niini mao ang pagkuha lang og clearance gikan sa barangay.
Apan giinsister usab ni Cabalda nga dili makatarunganon ang maong gihimo sa mga opisyal sa nahisgutang barangay gumikan kay duna pa silay kaso karon nga pending sa Court of Appeals.
Gidugang pa ni Cabalda nga gipasakaan nila og reklamo sa Ombudsman Visayas ang tanang mga opisyal sa barangay pinangulohan ni Abella niadtong tuig 2004 gumikan sa pagpatukod niini og 80 ka nitso diha sa maong pribadong luna.
Gitinguha karon sa pamilyang Cabalda nga ipaabot ngadto kang Osmeña ang mao nilang reklamo aron mahatagan kini og kasayuran sa tinuoray'ng sitwasiyon sa maong luna nga nahimutangan sa sam-ang sa A. Lopez nga gidumala na karun sa Labangon.