Apektado sa access road nagpanon

Nagpanon nga midangop sa Cebu City Hall ang gibanabanang mokapin sa 40 ka mga pamilya nga apektado sa katukoran sa Mambaling Access Road nga nagdugtong sa South Reclamation Project (SRP).

Ang katuyoan sa maong mga pamilya mao ang pagpakigtagbo ngadto kang City Administrator Francisco Fernandez aron kubrahon ang ilang hinabang pinansiyal gikan sa siyudad nga tag P5 mil.

Ang maong kantidad mao kini ayuda sa siyudad sa ilang boluntaryong pagpahawa diha sa lugar nga ilang gipuy-an aron paghatag og higayon sa development sa maong lugar.

Gawas sa hinabang pinansiyal gipaangayan pa gyud ang maong mga pamilya og relocation site nga nahimutang sa may Kinasang-an.

Matud ni Edna Garcia presidente sa SRP Homeowners Association nga gipangayo usab nila ngadto kang mayor Tomas Osmeña nga hatagan sila og usa ka bulan nga lugway sa ilang pagguba ug pagpanghipos sa mga butang diha sa maong dapit aron mobalhin sa gitagana nga relocation site.

Hinuon wala makapaabot sa maong reklamo ang maong mga pamilya ngadto sa mayor gumikan kay wala motunga sa City Hall si Osmeña kagahapon sa buntag hinungdan nga ila lang nga gipadangat ngadto kang Fernandez ang mao nilang hangyo.