Mike andam mangu sa CCBDC

Andam og tagana si Bise Mayor Michael Rama nga modawat sa posisyon pagka chairman sa Cebu City Bantay Dagat Commission (CCBDC) hulip sa gipatay nga si Elpidio "Jojo" dela Victoria Jr.

Nasayran nga giangkon ni Rama nga daghan ang mirekomendar kaniya alang sa maong posisyon ilabi na kay usa usab siya ka sakop sa bantay dagat gikan pa niadtong tuig 1995.

Gipadayag sa bise mayor nga dili siya mahadlok ilabi na kun kamatuoran ang iyang gipanalipdan sa higayon nga siya unya ang magdumala sa maong katungdanan.

Matud ni Rama daan na silang nagkauban og krusada ni dela Victoria ug usa na niini ang gilusad nilang clean up drive ngadto sa tanang 16 ka mga coastal barangays dinhi sa dakbayan sa Sugbo nga areglahon nila sa pagpanglimpyo ka usa sa matag tulo ka bulan ang kadagatan ug tibuok kabaybayonan ning maong mga barangay.

Si Rama mao ang chairman sa Coastal Management Board (CMB) samtang si dela Victoria mao ang executive director.

Samtang si kanhi Konsehal George Rama nga maoy napilian ni Mayor Tomas Osmeña nga mohulip isip market administrator sa dakbayan sa Sugbo igo lang gipadayag dihang nahinabi sa mga tigbalita nga huna-hunaon pa ug tun-an og maayu ang maong gitanyag kaniya nga posisyon.