Kanhi polis nga ex-convict gipusil

Usa ka kanhi polis ug ex-convict ang gipusil atol sa tabo kagahapon sa hapon 1:30 ang takna sa Mantalungon, Barili.

Ang biktima giila sa kapolisan nga si Martin Layam nga taga Guibuangan, sa naasoy'ng lungsod, ug nag-alagad sa munisipyo isip maninikit, samtang gitumbok nga mipusil mao si Jojo Gonsaga, 40, negosyante og baka nga taga Tabunok, Talisay.

Si Layam nakaangkon og samad pinusilan, duha sa walang paa, ug usa sa tuong paa, agi sa kalibre 40, nga maoy gigamit sa pagpusil sa suspetsado ngadto sa biktima.

Si PO2 Lenlen Ricaplaza sa Barili Police Station nga nahinabi ning tigbalita miingon nga base sa ilang nadawat nga impormasyon nagkalalis ang biktima ug ang suspek sa ubos nga bahin sa may bakahan apan wala pa matino sa kapolisan kun unsay tinuoray nga hinungdan nga misampot sa pagpamusil sa suspetsado ngadto sa biktima.

Matud ni Ricaplaza nga human sa hitabo daling misibat si Gonzaga sakay sa habalhabal palayo sa maong dapit ug gibiyaan lang ang iyang pinalit nga mga baka nga gikarga na unta sa trak de-karga.

Samtang si Layam daling gihatod sa South General Hospital sa lungsod sa Naga.