Gawas sa kapitan nga si Rodulfo Samellano, missing usab ang radio operator sa M/V St. Michael I nga si Romeo Sangkap apan nakit-an ra ang patay'ng lawas ni Sabellano "Benjie" Bulala diha na sa baybayon pila ka oras human sa pagkatikyaob.
Si SPO1 Claudio Castro Jr. sa Liloan police station mitug-an sa Banat News nga usa ka Nilo Dimampo nga nagpuyo sa maong dapit maoy nitaho sa insidente hinungdan nga ilang gipahibalo ang Coast Guard Cebu-Station.
Samtang si Second Petty Officer Bonifacio Lastimosa sa Coast Guard Station-Cebu pakighinabi sa Banat News mitug-an nga ang mga biktima uban sa laing pito ka mga tripulante luwan sa "bote" nga dunay "outboard motor" kun makinang gamay padulong na balik sa ilang barko.
Sigun pa ni Lastimosa gikan pa nagkuha og probisyon kun suplay ang grupo diha sa ilang buhatan nga diha mahimutang sa nahisgutang baybayon samtang giangkorahe ang ilang barko sa gibana-banang 350 ngadto sa 400 ka metros nga gilay-on gikan sa baybayon diin mas lawom ang dagat.
Gikataho usab nga niadtong tungura ang chief engineer sa maong barko gihatud sa grupo diha sa baybayon ug sa ilang pagbalik nahitabo na ang aksidente, apan wala kini ikumpirmar sa coastguard.
Sumala pa sa mga naluwas dunay dagkong bawod nga mihapak kanila dihang pila nalang sila ka metros diha sa kilid sa barko kalit nga mitakilid ug mitikyaob sila ang bote.
Giila ang mga naluwas mao sila si Domingo Ebarle, Roselito Libolibot, Roy Basalan, Joven Camiguing, Julius Magalona ug Jaime Roble, Meljun Salundaguit nga pulos hingkod ang panuigon.
Hangtud ning pagsulat sa balita padayon pang gisawom sa mga frogmen sa coastguard ang dapit aron makit-an ang duha ka mga opisyal.
Ang M/V Michael I gikan pa sa dakbayan sa Iligan sa Mindanao dala ang mga kemikal nga soda nga dad-on sa Batangas. -Uban sa taho ni Romeo Limpangog