Lhuillier kompleto sa papeles - PENRO

Gihimakak kagahapon sa opisyal sa Provincial Environment Natural Resources Office nga kuwang og mga rekisitos si Michel Lhuillier pagpahigayon og quarry sa Barangay Campusong, Borbon.

Gitataw kagahapon ni Glenn Baricuatro sa Banat News nga adunay environmental certificate gikan sa Environmental Management Bureau og gihatagan og kopya sa maong certificate ang kagamhanan sa barangay sa Campusong ug ang kagamhanan sa Borbon.

Kahinumduman nga si Mayor Neal Vergara mibutyag nga kulang sa rekisitos ang mga Lhuillier hinungdan nga napahunong ang gipahigayon niining pag-quarry sa lugar apan mibalik kini sa pagpanghakot og anapog sa milabay'ng semana human mobayad og P500 mil sa Penro.

Si Baricuatro nagkanayon kagahapon nga ang nahisgutang bayad buhis ug extraction pay bahinon kini sa Sangguniang Barangay, kagamhanan sa Borbon ug lalawigan.

Ang Sanguniang Barangay adunay 40 porsiyento nga bahin ug 30 porsiyento sa municipal ug 30 porsiyento usab sa provincial government.

Base sa dokumento nga gipakita kagahapon ni Baricuatro ang ngalan ni Peche Cabrera maoy nahimutang sa permit sa small-scale quarrying permit.

Ang maong permit giisyu niadtong Agosto 23, 2005 ug mapupos kini karong Agosto 22, 2007.

Si Baricuatro nagkanayon nga napahunong ang pag-quarry tungod kay wala ma-monitor sa kagamhanan sa barangay ang mga delivery receipts.

Ang kagamhanan sa barangay maoy mag-monitor kun pila ka cubic meter ang nahakot nga anapog apan napakyas ang Barangay sa pag-monitor hinungdan nga gipahunong una sa PENRO ang pag-quarry para makwenta kun pila ang wala mabayari.

Sa milabay'ng tuig ang mga lumulupyo sa lugar miduso og reklamo sa korte kabahin sa ownership sa lote.

Ang mag-uuma sa lugar miangkon nga sila maoy nanag-iya sa lote base sa Agrarian Reform Program apan si Lhuillier adunay giduso nga deed of sale sa Penro pagmatuod nga siya maoy tag-iya niini hinungdan nga gitugotan kini nga mag-quarry sa lugar.

Si Baricuatro midungag nga si Lhuillier ug ang mga residente sa maong barangay angayang adto na lang mag-atubang sa korte aron masulbad ang panagbangi.