Ocampo luwas sa Talisay

Gipasalig sa piskaliya sa Talisay City nga mas luwas ang prisohan sa Talisay kay sa National Bureau of Investigation (NBI) kun hisgotan ang bahin sa "safety" ni SPO1 Marcial Ocampo.

Matud pa ni Talisay City Prosecutor Marcial Rubia nga ang kahimanan sa Talisay City Jail maoy labing maayo sa tibuok rehiyon 7, busa way angayang kahadlokan si Ocampo nga may mopatay kaniya.

Matud pa ni Rubia nga kun may mga tawong naligsan si Ocampo kaniadto sa dinakpanay nila sa mga nahilambigit sa patigayong ilegal nga drugas diha sa Talisay ug nagdumot kaniya, dugay na unta siyang gipatay niini sa iyang pag-kadestino diha sa Minglanilla Police Station.

Kini maoy reaksiyon ni Rubia sa mga kabalaka sa abogado ni Ocampo nga basin kuoton si Ocampo ug patyon samtang naa siya sa prisohan sa Talisay.

Sayo niini, misang-at og mosyon si Atty. Vicente Fernandez II nga ipabalik lang si Ocampo ngadto sa prisohan sa NBI basin intawon kini diha sa Talisay City jail.

Kini samtang nagtuo si Fernandez nga naa pa diha natanggong karon ang mga nadakpan ni Ocampo nga nalambigit sa kalihokan sa ilegal nga drugas sa dakbayan.

Hinuon sa laing bahin kun may lain mang tawo nga gikan sa gawas sa prisohan nga mopatay kang Ocampo, maglisod kini tungod kay ang mga jailguard sa prisohan sa Talisay pulos na hanite ug batid sa ilang trabaho.

Lahi na usab nga kaso kun may anggulo na nga "kill the killer" order nga gikan sa usa ka "mastermind" kay kini magtumbok lang nga "hired killer" gyud si Ocampo.

Apan kining tanan gitun-an pa sa korte samtang mao pa lay pagsang-at sa pormal nga kiha batok kang Ocampo.

Matud pa ni Rubia nga ang pamatuod sa upat ka mga testigos sa pagtumbok nila kang Ocampo nga maoy mipatay kang Cebu City Market Administrator Elpidio "Jojo" dela Victoria Jr. maoy nakapapriso sa nahauna ug makagawas lang siya, kun may lig-on siyang pang-alkontra niini.