CEBECO office giralihan

Nagprotesta ang gatusan ka mga molupyo sa mga lungsod sa amihanang bahin sa Sugbo sa buhatan sa Cebu Electric Cooperative (CEBECO) sa may Patria de Cebu Incorporated atbang nga bahin sa Cebu Metropolitan Cathedral kagahapon sa alas 10:00 sa buntag.

Ang gibanabanang mokapin sa 250 ka mga molupyo gikan sa mga lungsod sa Bogo, Tabogon, Borbon, Daanbantayan ug Sogod miprotesta batok sa gihulagway nila nga dili makiangayon nga polisiya nga gipatuman karon sa management sa CEBECO-II.

Gibutyag ni Edward Ligas, tigpamaba sa Katawhan alang sa Barato nga Kuryente (KABAK) tumong sa mao nilang protesta aron pag-awhag sa manager sa CEBECO nga si Ed Satina nga moatubang kanila ug mohatag sa maong katin-awan.

Ang ilang gireklamo mao nga kun silang mga kabus ug yanong lungsoranon malangay og bayad sa binuwan nga bayranan sa kuryente bisan lang og duha ngadto sa tulo ka adlaw dili sila pasaylo-on ug putlan dayun sila sa CEBECO og kuryente.

Gibutyag usab ni Pepito Bayno, taga Borbon Cebu nga bisan og makuwangan lang sila og P10 sa ilang ibayad putlan gihapon sila og kuryente.

Apan matud ni Ligas ang nakabati sa polisiya sa maong management gumikan kay kun ang adunahan ug impluwensiyado nga politiko dili makabayad og kuryente wala gyuy disconnection nga mahitabu bisan pa og moabot na ang utang niini og pipila ka bulan ug ang uban moabot na og tuig.

Usa sa gitumbok diha sa giduso nga manifesto sa maong grupo ngadto sa buhatan ni Satina mao ang pagkawalay aksiyon nga gihimo niini kabahin sa dakong utang sa kuryente nga bayranan sa sibya-anan sa radyo DyCM nga nahimutang sa lungsod sa Bogo nga miabot na karon og P162 mil ang utang niini sa kuryente apan wala gyud putli hangtud karon.

Subay sa dokumento nga giduso sa Kabak ngadto sa CEBECO, ang maong bayranan sa kuryente sa DyCM nga P162 mil niadto pa kining bulan sa Oktubre tuig 2005. Gani niadtong Pebrero 16 niining tuiga gipadalhan na kini og notice of disconnection apan hangtud karun padayon gihapon kining wala maputli og kuryente bisan og wala mo-atiman og bayad.

Tumang kalagot ang gibati sa maong mga nag-protesta nga nanawagan nga mokanaug sa puwesto si Satina ilabi na dihang wala kini moatubang kanila aron motubag sa ilang mga reklamo ug ang staff lang niini ang gipadawat sa ilang giduso nga manifesto.

Matud ni Ligas dihang nahinabi sa Banat news plano nila nga mohangyu ngadto kang Fr. Paquing Silva, kinsa maoy nagtudlo kang Satina, nga ipatangtang kini sa katungdanan.

Kagahapon mideretso sa Kapitolyo ang maong grupo aron mangayo og panabang kang Gobernador Gwendolyn Garcia.

Mipasalig ang gobernador nga motabang sa yangungo sa mga molupyo sa nahisgutang lugar ug plano niya nga moduso og position paper ngadto sa buhatan sa CEBECO-II.

Mohangyo ang gobernador ngadto kang manager Satina nga ipatuman ang patas nga polisiya sa mga konsumidor og kuryente sa nahisgutang mga lugar ug walay palabihon.