4 sakop sa KFR gang wa motunga sa korte

Wala mopakita sa korte ang upat ka mga gituohang sakop sa kidnap for ransom (KFR) gang nga nasikop sa mga elemento sa Philippine Center for Aviation Security-7 sa Mactan Cebu International Airport sa milabay'ng bulan.

Matud pa ni Lapu-Lapu Municipal Trial Court in Cities Clerk of Court Arlene Laude nga nahinabi sa Banat News nga sa milabay'ng Abril 6 gikatakda ang arraignment sa kasong Usurpation of Authority batok nila ni Crisologo Puzon, Ronald Pepino, Jessie Pepino ug Richard Orayan diin gitumbok nga sakop sa KFR gang.

Matud pa ni Laude nga si MTCC Judge Ester Veloso mihatag og mando ngadto kang Atty. Ruby Semblante, ang abogado ug bondsman sa mga akusado nga kinahanglan isumiter ngadto sa korte ang upat ka mga dinakpan sulod sa 30 ka adlaw.

Subay niini, miluwat si Veloso og bench warrant batok sa upat ka akusado human gibawi sa korte ang P40 mil nga piyansa pabor na sa gobyerno gumikan sa kapakyas sa upat pagtunga atol sa arraignment sa kaso niadtong Abril 6.

Kahinumduman, sila si Puzon, Ronald ug Jessie Pepino ug si Orayan gisikop sa mga sakop sa PCAS-7 sa arrival section sa MCIA human kini mipresentar nga mga sakop sa polis ug militar diin nasuta nga peke ang ilang mga identification cards.

Human kini masikop nakuhaan pa gyud kini og tag-as nga kalibre sa armas lakip na ang usa ka sakyanan. Human mapasaka ang kaso ngadto sa piskaliya dali kini nga nakapiyansa og tag P10 mil matag usa kanila.

Sa dihang gibuhian na, nasuta sa kapolisan nga ang upat mga sakop diay sa kidnap for ransom group nga buot unta mohimo og operasyon sa maong tugpahanan niadtong Marso 5 ning tuiga.