Cebu Doc mopa-scholar ni Vincent dela Victoria

Mohatag og scholarship alang sa libreng pagtungha sa kolehiyo ang Cebu Doctors College ngadto sa bugtong anak sa gipusil patay nga program director sa Bantay Dagat Commission ug Acting Cebu City Market Administrator Elpidio dela Victoria Jr.

Atol sa press conference kagahapon sa udto gi-anunsiyo ni Mayor Tomas Osmeña ang progresibong resulta sa gihimo niyang pagpakighinabi ngadto sa pamilyang Larazabal, ang nanag-iya sa maong tunghaan.

Giangkon sa mayor nga siya ang personal nga mihangyo nga patiwason og tungha ang anak ni Jojo nga si Vincent sa kolehiyo nga libre sa tanang bayronon.

Nasayran nga pagkakaron anaa na sa third year college si Vincent sa Cebu Doctors College ubos sa kurso nga nursing.

Kini maoy ikaduha na nga kurso nga gikuha ni Vincent diin una kining migradwar sa kursong commerce didto sa University of San Carlos (USC).

Gawas niini, gipahibawo usab sa mayor nga mipasalig ang Cosmopolitan Funeral Homes sa Nivel Hills Lahug diin anaa karon hayaa si dela Victoria nga dili magpabayad sa gastuhan.