International business conference ni idungan sa Asean Summit

Gawas sa Asean Summit nga ipahigayon dinhi sa Sugbo karong Disyembre lain usab nga international nga kalihukan ang ipahigayon dinhi gihapon sa Sugbo sa susamang higayon sa Disyembre.

Gawas sa 12th Asean Summit nga 11 hangtud sa 14, lain usab nga halapad nga kalihukan ang ipahigayon gikan sa petsa 9 hangtud sa 11 sa susamang bulan dinhi sa dakbayan.

Kini mao ang International Business Conference nga tambungan usab unya sa mga dagko ug langyaw'ng magpapatigayon sa lainlaing dapit dinhi sa kalibutan.

Tungod niini, gitahasan dayon ni Mayor Tomas Osmeña si City Information Officer Nagiel Bañacia nga makig-alayon ngadto sa tanang mga dagkong hotel dinhi sa dakbayan alang sa maong katuyoan.

Kini tungod kay nagkinahanglan karon ang siyudad sa Sugbo og dili mominos 250 ka mga lawak sa hotel aron mao unyay kaabtan sa mga bisitang langyaw'ng negosyante nga motambong sa maong konperensiya ingon man sa dili mominos 17 ka mga pamuno nasud nga motambong usab unya sa Asean Summit.

Wala pa kini labot sa mga cabinet secretaries nga kauban unya sa mga presidente sa lainlaing kanasuran nga motambong sa maong summit.

Giangkon ni Osmeña nga dugang responsibilidad sa siyudad ang paghatag og seguridad sa maong mga langyaw'ng bisita nga gitumong usab unya alang sa pagpalambo sa siyudad sa Sugbo.

Gipasalig sa mayor nga andam og tagana ang dakbayan nga mogasto sa ubang mga kinahanglanon sama sa pagtukod og mga proyektong infrastraktura ug mga dekorasyon aron magpanindot sa palibot sa dakbayan sa panan-aw unya sa mga bisita atol sa maong okasyon.