10 ka sakyanan kinawat sa Korea gisakmit sa BOC

Napulo ka mga luhong sakyanan nga kinawat didto sa nasud sa Korea ang gipalusot dinhi sa Sugbo.

Ang director for International Cooperation Division, Intelligence and International Affairs Bureau sa Korea Customs Service nga si Roh Suk-Hwa nakig-alayon kang John Simon, ang hepe sa International Affairs sa Bureau of Customs sa Pilipinas.

Miabot sa Sugbo niadtong Abril 13 ang lima ka 40-footer container vans luwan sa Pearl Island vessel diin gisulod ang kontrabando.

Gipahibawo sa kadagkoan sa Korea Customs Service nga kinawat ang maong mga sakyanan ug ebidensiya sa nagpadayung imbestigasyon sa kaso sa smuggling.

Gipabuksan kagahapon ni Cebu Customs District Collector Atty. Maria Lourdes Mangaoang ang lima ka vans ug nasuta nga may sulod kini nga tag duha ka sakyanan diin walo ka Kia Sorento ug duha ka Hyundai Starex van ang sulod niini.

Matud pa ni Mangaoang nga iuli ngadto sa nasud sa Korea ang maong sakyanan ug kuhaon kini sa mga opisyal sa Korea Customs Service ug embahada sa Korea sa Manila.

Samtang gibutyag ni Mangaoang nga ang maong transaksiyon kabahin na sa tawo nga nagtinguha nga mohulip kaniya.

Wala hinuon nganli ni Mangaoang ang maong tawo. Apan sa nasayran, si collector Gracia Zuño Caringal ang nagtinguha nga mohulip kaniya.

Matud pa ni Mangaoang nga nakadawat siya og impormasyon nga duna nay mga tigum nga nahitabo nga may ipalusot nga bisan unsa nga kontrabando sa higayun nga mahulipan na siya sa katungdanan.

"They thought nga by this time, di na ako ang collector," nagkanayun si Mangaoang atol sa press conference kagahapon.

Dugang pa ni Mangaoang nga may nagpaluyo usab nga negosyante sa pagpalusot sa maong kontrabando ug may kasabutan na tali sa tawo nga nagdali-dali sa paghulip unta kaniya.