Si Konsehal Lorenzo Monsanto namahayag nga giuna nila sa pagsuta ang mga resibo nga naisyu ngadto sa mga dagkong balay-patigayon sa ilang barangay tungod kay mao kini ang nakabayad og daku-dako nga buhis.
Si Acting Deputy Ombudsman Virginia Palanca-Santiago mimando sa mga opisyal sa Lorega nga moabag sa gilusad nila nga imbestigasyon pinaagi sa pagsuta kun unsa ang mga balay-patigayon sa Lorega nga nagbayad og buhis sa barangay.
Ang pasiuna nga nasuta ni Monsanto mao nga dunay usa ka shipping office nga nagbase sa M.J. Cuenco avenue nga nakabayad og P1,200 nga business clearance.
Base sa control numbers, itandi kini ngadto sa duplicate ug triplicate copies sa resibo aron sutaon kun tinuod ba nga lakip kini sa gibinuangan sa revenue officer nga si Edgar "Loloy" Nillas.
Si Nillas miangkon na sa iyang ilegal nga binuhatan ug mitug-an nga daghang higayon nga ang secretary sa barangay nga si Milagros "Mely" Merino maoy iyang sugoon sa pagpasuwat sa resibo aron pagamyan ang kantidad.
Ang mibalik na nga si Kapitan Fortunato Parawan wala pay huna-huna nga iyang ibutang sa preventive suspension sila si Merino ug Nillas tungod sa ilang ilegal nga kalihukan.
Dunay nagplano nga atol sa sesyon sa konseho sa barangay karong Miyerkules, ilang diskutihon kining maong lakang.