Polis nga mitumba no Jojo arestado

Giaresto kagahapon sa hapon sa Criminal Investigation and Detection Group 7 ang usa ka polis sa Minglanilla kalabot sa pagpatay kang Bantay Dagat Commission chairman ug usab Cebu City Market administrator Elpidio dela Victoria.

Si SPO1 Marcial Ocampo, sakop sa Minglanilla Police gipailawom sa police line up kagahapon diin siya positibong giila ug gitumbok sa upat ka mga testigos nga mao gyud ang tawong nagkawo nga ilang gigukod human pusila si dela Victoria niadtong Miyerkules Santo sa hapon diha sa Ramona Subdivision, Dawis, San Roque, Talisay City.

Matud pa ni CIDG7 regional director Jorge Corpuz atol sa pakighinabi sa mga tigbalita kagahapon nga "siyento uno" porsiyento gyud silang si Ocampo mao ang ilang gipangitang gunman ni dela Victoria base usab sa pagkatukma niini sa cartographic sketch ug ang positibong pag-ila kaniya sa mga testigo.

Si Ocampo gipatahan sa iyang hepe nga si Chief Insp. Virgilio Jurado ug ni Cebu Provincial Police Office director, Sr. Supt. Vicente Loot sumala pa ni Corpuz diha sa ilang buhatan aron pagklaro sa maong kaso sanglit mitukma sa iyang deskripsyon ang suspek.

"They are 101 percent sure nuong pinasuot namin siya ng bush hat (lousy cap)," sumala pang Corpuz dihang ang mga testigos maoy mihangyong pasuoton kini og kawo susama sa gisuot sa gunman niadtong gipatay si dela Victoria.

Dugang pa ni Corpuz nga mi-file og 30 ka adlaw nga leave of absence si Ocampo sa iyang hepe niadtong mga nakalabay'ng mga adlaw.

Sa pagkakaron ang Task Force Jojo nga gilangkuban sa Cebu City Police Office, CPPO, Talisay Police Office pinanguluhan sa CIDG7 matud pa ni Corpuz naa na sa proseso sa pag-establisar ug pagpalig-on sa ilang kaso batok sa mga suspek .

Dugang pa niini ang pag-analisar sa kalambigitan ni Ocampo sa kaso ug ingon man ang pag-link sa mga gidudahang mastermind niini. Daan nang gitug-an nga ang mipatay kang dela Victoria dunay tsapa sanglit sumala pa sa CIDG7 nga niadtong nag-change magazine ang suspek migimaw ang tsapa niini diha sa hawak.

Si Ocampo susama ni dela Victoria minyo ug dunay usa ka anak kasamtangang nagpuyo diha sa Tres de Abril ning dakbayan. Nasugod siya pagserbisyo isip usa ka konstable sa Philippine Constabulary niadtong 1988, nahimo siyang aktibo sa Task Force Banat kaniadto. P1M na ang ganti motudlo's mastermind Ni Edwin Ian Melecio ug Brenda Batuto

Aron mapadali ang pagkasulbad sa kaso sa pagpatay kang Elpidio dela Victoria ang orihinal nga P200,000 nga ganting gitanyag ni Mayor Tomas Osmeña gihimo na karong P1 milyon alang ni bisan kinsang makatug-an kung si kinsa ang utok sa pagpatay sa maong opisyal.

Bisan na ang triggerman giawhag sa mayor sa pagtug-an kun si kinsa ang misugo kaniya aron kini ang makadawat sa maong ganti.

Si dela Victoria maoy project director sa Bantay Dagat Commission, mao usab ang Market Administrator sa dakbayan ug presidente sa Philippine National Association of Fishwardens gipatay niadtong Miyerkules sa hapon diha sa ilang balay sa dakbayan sa Talisay sa usa ka wala mailhing tawo.

Sumala pa sa mayor mas interesado siya sa mastermind kay sa triggerman maong iyang gipadak-an ang tanyag . Si dela Victoria sa buhi pa kini dihang gikahinabi sa Banat News niadtong Marso 27, mitug-an nga dunay patong nga tagsa ka milyon ang ulo nilang duha ni Atty. Antonio Oposa.

Wala hinuon motug-an ang duha kun si kinsa ang maong mga nagpasiugda niini apan matud pa ni Oposa sa samang interbiyu base sa impormasyong iyang nadawat gikan sa mga naligsang pundok sa mga commercial fishers ang maong hulga ug patong sa ilang mga ulo.

Si Oposa ug dela Victoria maoy nangusog sa kampanya batok sa illegal nga panagat, ug ingon man ang pagpatuman sa hingpit sa balaod nga nagdili sa mga commercial fishers diha sa Visayan Marine Triangle nga niadto pa nameligro na sa mga illegal nga mangingisda.

Ang kapolisan dako og pagtuong may kalambigitan sa trabaho ni dela Victoria ang motibo sa pagpatay.

Giangkon sa mayor nga medyo apektado karon ang operasyon sa dakbayan sa pagkahanaw ni dela Victoria. Gihulagway sa mayor nga usa ka maayong empleyado si dela Victoria nga maoy gikinahanglan alang sa paglambu sa Sugbo.

Sa buhi pa si dela Victoria wala kini reklamo sa duha ka gimbuhatong gisangon kaniya bisan ang usa niini walay suweldo nga mao ang pagka tsirman sa Bantay Dagat Commission ug trabaho niini pagka - market administrator sa dakbayan .

Karon ang maong mga gimbuhaton bahinon aron mapadayon ang gimbuhaton ni dela Victoria diin sila si Atty. Allan Gaviola maoy mangulo unya sa pagpadayon sa market denial aron magpabilin nga dili makasulod sa kamerkadohan dinhi sa dakbayan ang mga isda nga nakuha gikan sa illegal nga panagat.

Samtang usa usab ka retiradong koronel sa Philippine Army nga wala lang una itug-an ang pangalan ang kuhaon sa mayor aron maoy mangulo pagdakop sa mga ilegal nga mananagat.

Si Oposa sa iyang bahin mipadayag nga malisud makakita og susama'g kinaiya ni dela Victoria sa natad sa trabaho, dedikasyon sa iyang gituohang husto ug "commitment" sa iyang gibuhiang pulong ug baruganan.

Gipahibalo ni Oposa nga usa ka santuaryo sa mga isda sa amihanang bahin ning lalawigan ang gikatakdang ngalanan sa pangalan ni dela Victoria ingon man si Osmeña naglaraw nga ipangalan usab kang dela Victoria ang kanhi Kawit Island alang sa pagpakita og pagtamod sa nahimong maayong buhat sa gipatay nga environmentalist