Blangko pa ang polis sa dela Victoria murder

Nag-atubang pa karon sa blangkong bungbong ang mga imbestigador sa kaso sa pagpatay kang Cebu City Market Administrator Elpidio 'Jojo' dela Victoria apan miangkong duna na silay mga gihagpatang mga anggulo nga ilang gisubay.

Ang deputy regional director sa Criminal Investigation and Detection Group 7, Chief Inspector Rex Derilo sa pakighinabi sa Banat News mibutyag nga pagkakaron bugtong ilang gisaligang subayunon mao ang gipagawas nga "cartographic sketch" sa suspek.

Sumala pa ni Derilo nga duna na silay mga gipang-sundang mga anggulo ug mga tawong gipanid-an nga posibleng dunay kalambigitan sa kaso ni dela Victoria apan dili pa niya ikabutyag tungod sa kabalakang makaapekto unya sa ilang imbestigasyon.

Ang Talisay police mipahibalong duna silay usa ka suspek nga gitanggong karon nga si Rene "Tata" Barangan, kinsa suspek usab sa pagpatay sa usa ka PUJ driver diha sa dakbayan sa Talisay niadtong Biyernes "kaanggid" og hulagway sa cartographic sketch sa mipatay kang dela Victoria.

Si Sr. Insp. Patrick Vaño sa CIDG7 sa unang pakighinabi mitug-an nga ang wala magkatukma ang pamahayag sa mga testigos dihang nakit-an si Baranggan, dunay miingon nga susama niya og hulagway apan ang laing mga testigo mitug-an nga dili gyud kini mao ang tawong mipatay kang dela Victoria.

Si dela Victoria giisip nga usa ka bayani sa natad sa pagpanalipod sa kinaiyahan ilabi na sa kadagatan, wala kini kukahadlok nga mopadayag sa iyang pagsupak kun dili mauyon sa iyang gituuhan nga husto.

Ang maong baruganan ni dela Victoria maoy gituuhan karon sa kapolisan nga maoy nahimong hinungdan sa pagpapatay kaniya, si dela Victoria uban ni Atty. Antonio Oposa nangusog sa pagdili sa pagpanagat sa Visayan Marine Triangle gumikan sa peligro nga madaut kini sa hingpit kung dili mapugngan.

Nunot niini dunay mga commercial fishing operators nga naapektahan sa pagpasirado sa maong kadagatan gani nidangat na ang maong problema ngadto sa buhatan ni Gobernador Gwendolyn Garcia pipila ka adlaw sa wala pa patya si dela Victoria.