Habalhabal driver sa Danao gi-ambush patay

Patay ang usa ka habal-habal driver ug naangol usab ang iyang usa ka pasahero human sila banhigi diin ang bala milagbas diha sa iyang agtang samtang nagsubay sa barangay Magtagubtub, Danao niadtong Martes sa buntag.

Ang namatay giilang si Roger Jopia, 31, biyudo, taga dalan Tupaz, barangay Suba dakbayan sa Danao samtang naangol usab ang iyang pasaherong si Rolando Bueno Esotto Jr., 28, residente sa Kan-an, Tuburan gumikan sa igo sa bala diha sa iyang walang bukton.

Ang konsehal sa naasoy'ng barangay nga si Virgilio Prieto maoy mitug-an sa kapolisan sa Danao nga dunay nakit-ang patay'ng tawo diha sa dalan hinungdan nga gisusi kini nila ni SPO3 Alfredo Tapia.

Sa paghiling ni Dr. Eric Chaves, ang medico legal sa nahisgutang dakbayan, patay na kini.

Nasuta sa imbestigasyon nga usa ka wala mailhing tawo ang kalit nga mibanhig sa mga biktima sa walay igong hinungdan, Si Esotto daling gidala sa Danao District Hospital samtang nakabsan gyud sa kinabuhi si Jopia.