Padung mag-CR gipusil sa Akrho

Patay ang usa ka 16 anyos nga batan-on kinsa padulong unta mangasilyas dihang giatangan sa duha ka gidudahang mga sakop sa Alpha Kappa Rho fraternity ug kalit nga mipusil sa biktima niadtong Lunes sa hapon.

Ang biktima kinsa gideklarar nga patay nang miabot sa Cebu City Medical Center giilang si Brenjun Taborada, 16, molupyo sa Block 3 Suba, ning dakbayan ug nakaangkon og usa ka samad pinusilan diha sa iyang likod nga milapos diha sa iyang dughan.

Duha ka wala mailhing mga batan-on ang gikatahong kalit nga mibabag sa agianan sa biktima ug kalit nga mipusil niini sa walay igong hinungdan. Nagtuo ang inahan sa biktima nga si Leonila nga mga sakop sa Akrho ang mga suspek ug ang iyang anak naalaang miyembro usab sa karibal nga grupo niini.

Mitug-an ang mga imbestigador sa Homicide Section sa Banat News nga nananghid ra ang biktima sa iyang inahan nga moadto sa Sitio Wakwak diin dunay papultahang kasilyas aron unta maglabay sa iyang hugaw apan giatngan kini sa mga suspek ug gipusil.