2 pushers nga nagsuyop, gipamatay sa vigilante

Duha ka gidudahang mga drug pusher gipamatay diha mismo sulod sa ilang balay samtang sila gituohang nanuyop diha sa dalan Mabini, Mabolo, ning dakbayan niadtong Lunes sa gabii.

Ang mga biktima giilang sila si Dante Gaviola, 38, residente sa nahisgutang dapit ug higalang si Robert Limbaga, 37, residente usab sa dalan St. Jude sa samang barangay.

Sumala pa sa imbestigasyon sa Homicide Section sa Cebu City Police Office base sa gitug-an sa testigo usa ka kolor yellow nga multicab nga may tulo ka luwang tawo ang miabot ug ang usa mikanaog nga nagtaptap og panapton sa nawong dayon miadto sa balay ni Gaviola.

Dangtan pila ka gutlo kalit nga mipaka-paka ang buto sa armas ug diha na makit-ing migawas ang maong lalaki ug daling misakay og balik sa multicab ug miikyas subay sa dalan St. Jude.

Diha na nila masayring sila si Limbaga ug Gaviola gipamusil diin ang duha pulos nakaangkon og samad pinusilan. Si Limbaga gipusil sa nawong samtang sa luyo sa ulo usab si Gaviola nga nakaingon sa ilang hinanaling kamatayon.

Dunay mga drug paraphernalia nga nakuha diha sa ilang gikahimutangan lakip na ang duha ka basiyo sa kalibre 9mm nga bala ug usa ka cellphone nga 3310.

Ang testigo kinsa diha sa kalsada duol sa gihunungan sa multicab mitug-an nga dunay plakang "YYG 218" o ba kaha "YYG 278" ang maong multicab, ang kapolisan misusi na karon sa maong mga plaka diha sa Land Transportation Office.

Wala pa matino kun vigilante ba ang mitumba sa duha, apan base sa rekord sa Bagong Buhay Rehabilitation Center gibutyag ni JO1 Catherine Cintos nga si Limbaga nasulod sa July 16, 2002 sa kasong paglapas sa Section 8 sa Akta Republika 6425 (drugs) ug nakagawas pagka Enero 17, 2003.

Samtang si Gaviola nasulod sa BBRC niadtong Agusto 6, 1992 sa kasong Sec.16 RA 6425 kun pagpayuhot og drogas apan ang maong kaso na-dismiss ug siya gipagawas human sa 20 ka adlaw nga pagkapriso.