Mananggiti ang nagbitay sa lubi

Wala pa masayri hangtod karon sa kapolisan sa lungsod sa San Francisco Isla sa Camotes ang tinuoray nga motibo sa kamatayon sa usa ka lalaki nga mananggiti kinsa napalgang patay ug nagbitay ibabaw sa iyang gisanggotan.

Si Romeo Montalban Caballes, 36 anyos, minyo nga taga Cabangaan, ning lungsod, napalgan sa iyang amahan nga si Isabelo nianang alas 8 niadtong Sabado sa buntag sa dihang kini nanawat og tuba sa maong dapit.

Gibutyag ni SPO1 Sherwin Abellare, desk officer sa kapolisan ning lungsod sa pakighinabi sa Banat News nga ang amahan nga si Isabelo nay mireport kanila kabahin sa gidangatan sa iyang anak.

Ilang naabtan si Romeo nga wala nay kinabuhi apan dihay gihigot nga gamay nga lanot sa iyang liog, nga maoy gituohan sa kapolisan sa hinungdan sa iyang kamatayon.

Matud ni Abellare nga nagpadayon pa ang ilang gihimong imbestigasyon sanglit wala pay mitumaw nga mga tawo sa ilang presinto kun naghikog ba o gipatay sa wala pa mailhing tawo si Caballes.