Bonus sa City Hall i-release na

Bisan pa sa pagpangugat ni Mayor Tomas Osmeña nga dili gyud mohatag sa productivity bonus sa mga kawani sa siyudad sa Sugbo karong tuiga apan makadawat gihapon sa maong benepisyo ang mga empleyado sa dakbayan karong semanaha o ba kaha unya sa liwas sa semana santa.

Ang hepe sa Human Resource Development Office (HRDO) Ralph Sevilla mipagawas og memorandum ngadto sa tanang mga department heads niadtong April 7 nga nagpahibalo pag-release sa nahisgutang bonus.

Subay usab kini sa giluwatang memorandum ni City Administrator Francisco Fernandez niadtong Abril 5.

Ang mga kawani sa dakbayan magdawatan kini og tag P2,000 nga productivity bonus matag tuig.

Apan giklaro diha sa maong memorandum nga kadto lang mga kawani nga mga maayo og binuhatan kun dunay satisfactory rating ang makadawat sa maong benepisyo.

Gidid-an usab ang mga kawani nga nag-atubang og kasong administratiba nga makapahimulos sa maong benepisyo.

Sayo niini gipadayag ni Osmeña nga dili siya mo-aprobar paghatag sa maong benepisyo o usbaw sa suholan kun dili niya masiguro nga mga maayo og performance ang mga empleyado nga makapahimulos niini.