Ang biktima giila sa kapolisan nga si Eluminado Povadora, hingkod ang panuigon ug ang gitumbok nga midakdak og bato mao si Amancio, maguwang sa biktima.
Base sa gihimong imbestigasyon sa kapolisan pinaagi ni SPO1 Reynaldo Branzuela sa pakighinabi sa Banat News nga nagkalalis ang biktima ug ang maguwang niini sayo sa buntag gawas sa ilang panimalay tungod sa gibaligya nga kabaw nga piangon, ug ang halin sa kabaw ipalit unta og lain apan kulangan na ang halin ug dili paigo nga ipalit.
Gibutyag ni Branzuela nga pwerteng sukoa ni Amancio ngadto sa iyang manghod, didto na magsugod pag-ulbo ang lalis sa duha.
Human sa ilang panaglalis si Eluminado niadto sa iyang payag ug natulog, apan si Amancio nga naglungot-lungot sa kalagot, giadto sa payag ug gidad-an og bato dayong dakdak.
Si Eluminado nakaangkon og dakong samad sa luyo sa iyang ulo hinungdan nga gidali pagdali sa Juan Dosado Memorial Hospital, apan gibalhin ra usab dayon dinhi sa dakbayan sa Sugbo.
Sa gihimong hot pursuit operation sa kapolisan ning lungsod nasikop si Amancio ug kasamtangan na karon gibalhog sa karsel, ug gipasakaan na og kaso nga frustrated parricide kagahapong adlawa.