ROTC sa Verallo-Bogo balik na

Human sa pipila ka tuig nga pagkaundang, ang Army Reserve Officer Training Corps (ROTC) program nabalik na sa amihanang Sugbo human ang Felipe R. Verallo Memorial Foundation Inc. (FRVFI) nga usa ka non-sectarian nga tunghaan sa Clotilde Hill, Dakit, Bogo, Cebu mipabalik sa maong programa sa college curriculum niini sugod sa Hunyo, pagbukas sa unang semestre sa school year 2006-2007.

Si Ms. Clomen Verallo Jamoral, presidente ug chairman of the board sa FRVFI, atol sa pakigtagbo ni Major Samson Deles, commanding officer sa 701st Community Defense Center, 7th Regional Community Defense Group, Army Reserve Command, niadtong Marso 21, 2006, mikonpirmar sa pagbalik sa ROTC program sa curriculum sa maong tunghaan. Kini human masuta ang ka-importante sa training niini alang sa pagtudlo og disiplina sa mga tinun-an niini.

Si Jamoral nagkanayon nga nadismaya siya nga nag-obserbar sa mga tinun-an ubos sa Civic Welfare Training Service (CWTS) nga walay nakat-onan tungod kay hangtod karon ang maong component ubos sa National Service Training Program (NSTP) pinaagi sa Akta Republika 9163 wala gyuy program of instruction, walay direksiyon, ug walay dugang benepisyo nga matanyag.

Ubos sa ROTC program, ang mga gradwado niini mamahimong opisyal ug sundalo sa Armadong Kusog.

Si Jamoral mipadayag usab og pagsuporta sa plano ni Kongresista Eduardo Gullas sa ika-unom nga distrito nga pag-repeal sa R.A. 9163 aron ibalik pagka-mandatory sa mga tunghaan ang ROTC program.

Sa susamang kalambuan, si Major Deles mipasalig ni Jamoral nga ang ROTC program ug training sa FRVFI estrikto nga pagadumalahon sa iyang buhatan.

Si Major Deles nanawagan sa mga umaabot estudyante sa kolehiyo sa Bogo ug sa uban pang kalungsoran sa pag-enrol sa Army ROTC pinaagi sa pag-cross enrol ngadto sa FRVFI, sumala sa nalatid sa balaod.