Barko nasunog

Usa sa mga gidudahan sa tag-iya sa barkong nadanyos tungod sa sunog nga dunay luwan 800 ka mga tawo mao ang posibleng pagsabotahe gawas sa laing duha pa ka anggulong gituohang hinungdan niini.

Nagduda karon ang External Vice - President sa Robles Shipping Lines nga si Joy Roble nga posibleng dunay misabotahe sa ilang barko nga nakaingon sa walo ka minuto nga sunog nga milamoy sa ilang atop niadtong Domingo sa kaadlawon samtang ang maong barko padulong sa Ormoc City.

Ang MV Heaven Star nga ilawom sa pagdumala ni kapitan Rodulfo Saavedra migikan sa Sugbu alas 10 sa gabii ug gikatakdang moabot alas 2:30 sa adlawng Lunes apan samtang naglawig diha sa kadagatan sa Mirada, Leyte midilaab ang atop niini 1:50 sa kaadlawon.

Daling gipabalhin ni Saavedra sa iyang chief steward ang mga pasahero niini sa mas luwas nga habig sa barko ug gimando ang pagpawong sa kalayo sumala pa sa gipadangat nga kopya sa Marine Protest sa kapitan dinhi sa Banat News.

Nagsugod ang maong kalayo pasado ala una sa kaadlawon ug napawong gihapon sa firefighting crew sa maong barko ug luwas nga nakadunggo sa pantalan sa Ormoc pagka-alas 2:45.

Wala hinuoy nasakitan sa 800 ka mga luwan niini lakip na mga tripulante ug mga bata, apan nasunog ang tulo ka rescue boats, walo ka liferafts, ug ingon man 48 ka mga bed bunks nga nadaut gumikan sa pagkabasa sa tubig atol sa pagpawong sa kalayo.

Dunay tulo ka anggulo nga gidudahan si Roble nga posibleng hinungdan sa maong sunog, usa niini ang upos sa sigarilyo nga gibiyaan sa mga pasaherong mosaka sa taas, o ba kaha ang unang gikatahong hinungdan nga gikan kini sa tambutso ug ang ikatulo mao ang sabotahe.

Wala hinuoy gitumbok si Roble kung si kinsa ang posibleng mosabotahe sa ilang barko apan matud pa niya nga usa gyud kini sa ilang gisuspetsahan sanglit kadudahan para niya ang unang nigawas nga hinungdan nga gikan sa tambutso ang agipo.

Matud pa niya nga posible usab nga dunay nanigarilyo nga ang upos nagsiga pa ug naabot diha sa rescue boats nga dunay mga gasolina o ba kaha tinuyo pinaagi sa pagsabotahe.

Giisplikar ni Roble nga kung sa tambutso naggikan ang agipo dili kini mahitabo gumikan kay wala siya makakita nga dunay murag "aninipot" matag paandaron ang makina sa maong barko ug kun duna man giisplikar ni Roble nga mosaka kini dayon sa taas tungod sa hangin.

Kasamtangan pa karong giimbestigahan sa mga awtoridad ang hinungdan sa sunog, kahinumduman nga mao na kini ang ikaduha nga higayon nga dunay nasunog nga barko ning tuiga dinhi sa Central Visayas.