Si Atty. Antonio Opposa, Visayan Squadron team leader mibutyag kagahapon nga ang nahisgutang mananagat naggikan sa Bantayan ug mihatag kini og suporta sa ilang giduso nga petisyon sa pagpasira sa Visayan Sea aron kini mapreserba.
Gibutyag ni Opposa nga wala silay personal nga interes sa gipahigayon nilang kalihukan, ang pagprotektar sa kadagatan batok sa mga ilegal nga mangingisda ug sa gagmay'ng mananagat ang ilang gilantaw.
Si Elpidio Dela Victoria Jr. mibasol sa Bureau of Fisheries and Aquatic Resources (BFAR) nga wala dayon moluwat og kamanduan kabahin sa pagdili sa mga zipper o ilegal nga pagpanagat nga makaguba sa mga gasang.
Gibutyag ni dela Victoria nga ang BFAR adunay nahimong kalapasan tungod kay wala dayon kini moluwat og kamanduan sa pagpahunong sa nahisgutang klase sa pagpanagat nga nakahatag.
Matud ni dela Victoria nga ang BFAR miluwat og Fishery Administrative Order 222 niadtong 2004 nga ulahi na kaayo ug naanad na ang mga commercial fishing nga magpahigayon sa nahisgutang panagat og dako na ang nahimo niining kadaot sa marine life.
Si Opposa mibutyag usab nga ang Visayan Sea adunay gilapdon nga usa ka milyon nga kilometro kuwadrado ug adunay 130 ka grupo sa commercial fisher ug 650 mil ka gagmay'ng mangingisda ang nagpahimulos niini.
Gibutyag usab ni Opposa nga daghan kaayong gihatag nga lisensiya sa commercial fishing ang BFAR sa rehiyon siyete ug sayes.
Gitataw ni Opposa nga base sa balaod nga ang BFAR kinahanglang mohatag lang og fishing license base sa maximum sustainable yale ug sinati-on usa sa BFAR ang gidaghanon sa isda nga puwedeng makuha sa lugar aron dili sila magpataka og hatag og lisensiya nga makahurot sa isda lakip na ang mga gagmay.