Babayeng priso nakaanak sa selda

Usa ka babayeng priso sa Mabolo Police Station nakaanak sulod sa prisohan kagahapon sa buntag, pila ka gutlo human ibalik og sulod sa iyang karsel human kini gidala sa Cebu City Medical Center gumikan sa pagmulo niini sa milabayng gabii hangtud kagahapon sa kaadlawon.

Ang priso mao si Pilipinas Noval, 40 anyos, lumad nga taga Cagayan de Oro City ug kasamtangang nagpuyo diha sa Punta Prinsesa ning dakbayan. Si Noval nabalhog sa karsel sa Mabolo gumikan sa pagpanguot niadtong Sabado sa hapon.

Matud pa ni SPO1 Elvis Anunciado sa pakighinabi sa Banat News mitug-an nga nadakpan si Noval sa guwardiyang si William Husoy diha sa usa ka dakong mall sa barangay Mabolo ug sa biktima niining si Dr. Annette Laurente Salilas, nga taga Guadalupe ning dakbayan.

Sumala pa ni Anunciado nga gikuutan ni Noval si Salilas diha sa usa ka botique sa naasoyng mall diin nakuha ang pitakang may sulod nga P20,000; kwartang 50 dolyares, tseke , cellphone ug mga credit cards.

Si Noval pila ka oras human madakpi ug nabalhog sa karsel nagmulo nga misakit ang tiyan ug nangayog tabang sa kapolisan nga magpadala sa tambalanan gumikan kay kaanakon na siya.

Matud pa ni Anunciado gidala si Noval ngadto sa Cebu City Medical Center apan ang mga doktor didto gikatahong miingon sa mga polis nga dugay pa kining manganak, hinungdan nga ila kining gibalik og dala sa karsel.

Apan pag-abot diha sa karsel pasado alas 6:30 gihimugso ni Noval ang usa ka himsog nga batang lalaki hinungdan nga gikara-kara kini og atiman sa mga polis nga niadtong tungora maoy nag-duty pinanguluhan ni Inspector Pedro Quebido.

Ang bata giturn-over ni PO1 Ian Samson ang Womens Desk Section sa maong police station ngadto sa Department of Social Welfare and Development alang sa hustong pag-atiman.

Karong adlawa gipaabot sa kapolisan ang biktima ni Noval kun mopasaka ba kini og kasong pagpangawat. Kun idayon og pasaka ang kaso hayan mabuwag si Noval sa bag-o niyang gihimugsong anak.