34-anyos gitigbas-patay sa ugangan

Patay diha-diha ang usa ka 34-anyos nga lalaki human kini unaya sa pagtigbas sa iyang ugangan gamit ang usa ka sundang niadtong Sabado sa kaadlawon diha mismo sa iyang pinuy-anan sa Salog, Dalaguete.

Si Noel Macoy, residente sa nahisgutang lugar nakaangkon og samad tinigbasan sa iyang liog nga gituohang hinungdan sa hinanali niining kamatayon.

Si Antonio Sabanal alyas "Onying" silingan sa biktima kinsa maoy suspetsado sa nahisgutang hitabo daling miikyas human sa insidente ug padayon pa karon nga gipangita sa mga awtoridad.

Si Rosalinda nga asawa ni Macoy maoy mitaho sa kapolisan nianang pagkabuntag sa nahisgutang insidente.

Gibutyag kagahapon ni SPO2 Francisco Leornas nga nianang pagka alas tres sa kaadlawon si Rosalinda gitawag sa iyang bana kinsa nangayo og panabang.

Si Rosalinda daling migawas gikan sa ilang kuwarto ug nakita na niini si Noel nga nagbuy-od na sa sawog naligo sa kaugalingong dugo ug adunay samad tinigbasan sa liog niini.

Si SPO3 Benjamin Villahermosa sa Dalaguete Police Station sa pakighinabi sa Banat News nagkanayon nga si Rosalinda mipasangil sa iyang amahan nga maoy miunay pagtigbas sa iyang bana.

Gituohan sa kapolisan sa Dalaguete nga adunay dugay na nga panagbangi ang biktima ug suspetsado nga maoy hinungdan nga nahitabo ang insidente.

Si Antonio miikyas human sa hitabo ug gidala ang tanan niining mga butang.