Tom gidayeg sa mga Talisaynon

Gidayeg ni Mayor Socrates Fernandez sa Talisay City ang kagamhanan sa Cebu City tungod ning pagtugot nila nga makapanagat sa kadagatan sa Cebu City ang mga mananagat nga taga Talisay.

Matud pa ni Fernandez nga bulahan kaayo si Mayor Tomas Osmeña kinsa nakabatog kasingkasing sama sa mga opisyal sa gobyerno sa Talisay kinsa wala moisig-isig sa mga taga laing lugar nga mananagat nga mahisum-ok aron pagpanagat diha sa Talisay.

Hinuon giangkon gyud ni Fernandez nga tungod sa kadaghang mananagat sa Talisay, mag-inilogay gyud ni sa pipila na lang ka lugas nga isda sa kadagatan.

Kini tungod kay dili lang kay taga Talisay ang mamukot, mamasol, manudsod ug uban pang matang sa panagat, diha sa lawod sa Talisay, kundili modagsa usab diha usahay ang taga Minglanilla, taga Opon, ug usahay taga Cebu City usab nga mga mananagat.

Alang kang Fernandez nga bisan tuod may balaod, apan dili maayong isig-isigon ang mga kabos nga manimpalad aron makakuhag isda nga iya sa Ginoo diha sa dagat.

Busa matud pa niya nga mas maayo kining hiyas nga gipakita ni Mayor Tommy kay makapahiduol kini kaniya sa Ginoo.

Dili pa dugay misugot si Osmeña sa hangyo ni kanhi Mayor Dehlia Tiu sa Talisay nga makapanagat ang mga mananagat sa Talisay diha sa kadagatan sa Cebu City.