Bombero sa Bohol kulang og sakyanan

Bohol - Nabalaka ang mga opisyal ning probinsiya nga makahatag gayud sa dakong kadaot kon adunay mahitabo nga sunog sa mga lungsod nga wala gayud ilang kaugalingon nga sakyanan sa kabomberohan.

Gipadayag kini sa mga opisyal sa kalungsoran human usab nila makita nga mao gayud kini ang nag-una nga problema sa pagka karon.

Si Gobernador Erico Aumentado miingon nga gipaabot na nila kining maong problema ngadto sa Department of Interior and Local Government.

Matud pa ni Aumentado nga angayan gayud mahatagan sa igong pagtagad kining maong problema sa DILG.

Gumikan niini ang mga mayor miingon nga kon adunay mahitabo nga sunog sa ilang dapit ang ilang mahimo mao lang gayud ang pagpaabot og tabang gikan sa kabomberohan sa ilang silingan nga lungsod.

Giangkon hinoon sa kadagkuan sa kabomberohan sa probinsya nga kining maong problema dili lang sa Bohol kon dili sa uban usab nga lugar.