CITOM enforcer i-promote ni Tomas

Unom ka mga traffic enforcers sa City Traffic Operations Management (CITOM) ang makadawat og ganti gikan sa kagamhanan sa dakbayan sa Sugbo gumikan sa maisogon nga pagsikop og usa ka tulisan diha sa Mabolo niadtong petsa 21 sa milabay'ng bulan sa Marso.

Si Konsehal Sylvan "Jack" Jakosalem nipasar og resolusyon nga nag-awhag sa konseho nga hatagan og promosyon ang mga traffic enforcers nga sila si Benjie Matillano,Pablito Nuesana, Felizardo Escoto, Rhodora Ano, Josephine Ybanez ug Roderick Plaza.

Apan gipadayag ni Mayor Tomas Osmeña atol sa press conference niini kagahapon sa udto nga mohatag siya og tag P5 mil nga ganti sa maong mga traffic enforcers gumikan sa maayong gipakitang binuhatan niini.

Matud ni Osmeña dili siya magduha duha nga mohatag og ganti ingon man promosyon sa mga kawani sa siyudad nga nipakita og maayong binuhatan sa ilang trabaho.

Nasayran nga una nang gisupak sa mayor ang paghatag sa dugang P1,000 nga usbaw sa suholan sa mga kawani sa gobyerno nga gipatuman ni Presidente Gloria Arroyo gumikan sa katarungan dunay mga daghang kawani sa City Hall ang mga walay gibuhat og tapulan.

Una nang giklaro sa mayor nga mosugot lang siya nga mohatag og usbaw sa suholan kon hatagan siya og higayon nga pilion lang ang mga kawani nga angay makadawat sa maong usbaw sa suholan.