Biktima sa 'kiriwang' teller sa Talisay pareklamuhon

Giawhag ni konsehal Allan Bucao sa dakbayann sa Talisay ang mga katawhan nga adunay gikuptan nga resibo nga nakasinati ug dunay pagduda sa ilang transaksyon sa treasurer's office nga mopatim-aw sa iyang opisina aron makakuha og dugang ebidensiya kabahin sa gihimong pagpanglimbong sa usa ka teller sa nahisgutang dakbayan.

Mao kini ang gibutyag ni konsehal Bucao atol sa pakighinabi sa Banat News sa miaging adlaw sa iyang buhatan. Matud niya posibleng mag-atubang og preventive suspension kung dili man matangtang isip teller sa maong buhatan ang kiriwang teller kon mapamatud-an.

Matud niya nga mohimo og imbestigasyon ang konseho sa dakbayan aron mawala ang pagduda sa mga tawo.

Sumala ni Bucao nga iyang gisuportahan ang programa ni Presidente Gloria Arroyo nga nag-awhag sa ubang mga dagkong opisyal sa gobyerno nga tabangan siya sa pagpadagan sa gobyerno aron sa ingon mapalambo ang ekonomiya ug makahakot usab og dakong pundo ang gobyerno.

Nidugang si Bucao nga pagpamakak pinaagi sa pagkawat ang gihimo sa teller tungod kay gilimbongan pa ang katawhan.

Karong adlawa atol sa sesyon, ipalanog ni Bucao ang dakong pagpasalamat sa reklamante nga maisogon sa pagbulgar sa anomaliya sa maong teller.