Gipahibalo ni CPPO Director Vicente Loot nga hugot nga seguridad ang ipatuman sa mga pantalan ug mga bus terminal atol sa Semana Santa diin daghan ang manguli sa tagsatagsa nila ka probinsiya aron mamalandong sa kasaulugan.
Matud pa ni Loot nga ang ilang tutukan pag-ayo mao ang isla sa Bantayan diin maoy padulngan sa bagang duot sa katawhan matag Semana Santa gumikan sa nabantug na niining kalihukan nga wala sa ubang lugar.
Dugang pwersa sa kapolisan sa lalawigan sa Sugbo ang ipakatap ni Loot sa lungsod sa Bantayan ilabi na sa mga pantalan gumikan kay gamay ra ang mga polis sa maong lugar.
Usa niini ang pantalan sa Hagnaya, lungsod sa San Remegio diin magsugod pagsakay sa barko ang mga mobisita sa lungsod sa Bantayan gikan sa nagkalainlaing lugar sa nasud.
Ang mga sakyanan sa kadagatan gikan sa pantalan sa Hagnaya modunggo kini sa pantalan sa lungsod sa Santa Fe.
Sumala pa usab ni Loot nga makig-alayon sila sa ubang ahensiya sa kagamhanan sama sa Coast Guard ug Land Transportation Office aron mapatuman ang kahapsay ug kalinaw sa pagbiyahe sa mga tawo.
Giawhag usab ni Loot ang katawhan nga mokooperar sa kapolisan ilabi na sa mga himoong inspeksiyon sa mga terminal sanglit alang kini sa seguridad sa kadaghanan bisan dunay gamay nga kalangan sa pagbiyahe.