Panag-ilog sa pwesto sa BOC Cebu niabot na sa korte

Nisamot nga magpabilin pa og dugay si Atty. Lourdes Mangaoang isip district collector sa Bureau of Customs sa Sugbo bisan pa sa tinguha nga pagpabalhin kaniya.

Kini human niluwat og Temporary Restraining Order ang Court of Appeals kagahapon, usa ra ka adlaw human kini gipangayo ni Mangaoang.

Si Mangaoang nisang-at og petisyon sa pagpangayo og TRO niadtong Martes batok sa gikatakda unta nga mohulip kaniya nga si Gracia Caringal, Customs Commissioner Napoleon Morales ug acting Deputy Commissioner for Internal Administration Group, Bernardo Sales.

Si Morales ang nimando sa pagpabalhin kang Mangaoang ngadto sa Port of Iloilo ubos sa Customs Personnel Order-B-169-2006 niadtong Marso 31, 2006 samtang si Sales ang niluwat sa Certificate of Assumption ni Caringal sa Port of Cebu niadtong Abril 3 sa buntag.

Sa wala pa nasang-at ni Mangaoang ang iyang petisyon, may mando na si acting Customs Commissioner Alexander Arevalo niadtong Abril 3 sa hapon sa pagsuspenso sa kamandoan ni Morales.

Nunot niini ang abogado ni Caringal nga si Atty. Jeremias Mapula nipahibawo nga ilang tubagon ang TRO ug hangyoon ang CA nga libkason kini sa daling panahon.

Ang CA nihatag kang Caringal og napulo ka adlaw sa pagtubag sa TRO ug tubagon pa gyud kini ni Mangaoang sa sulod na usab sa lima ka adlaw.

Iinsister ni Caringal nga siya na gyud ang district collector sa Sugbo base sa certification nga giluwatan ni Sales.

"The TRO has no basis since the act has already been consumated," pasabot ni Mapula sanglit ilang gikonsiderar si Caringal nga nakalingkod na niadtong Lunes sa iyang katungdanan.