'Tsismis' maoy nakaingon nga ginang naghikog

Gumikan sa kauwaw dihang gi-tsismis sa iyang mga silingang "tabian" usa ka 34-anyos nga ginang ang naghikog niadtong milabay'ng tulo na ka adlaw ug niadtong Lunes na kini nakaplaging nagsugod na og kabaho diha sa Barangay Bahay lungsod sa Sibonga.

Patay na nga napalgan sa iyang mga paryente si Arsenia Tañeza, residente sa maong lugar diha sulod sa payag kilid sa iyang balay gumikan sa nangalisbong baho sa patay nga tawo .

Gibutyag kagahapon ni PO3 Marlon Cortez polis sa Sibonga nga gikahinabi sa Banat News nga base sa kahimtang sa patay'ng lawas niini gidudahan nga niadto pang Sabado kini gahikog tungod kay wala nila kini makita sukad niadtong Sabado ug medyo nabaho na ang patay'ng lawas niini.

Ang barangay Kapitan sa Bahay nga si kapitan Ruben Geralde maoy daling mipahibalo ngadto sa kapolisan kabahin sa hitabo.

Matud ni Cortez nga base sa suicide note ni Tañeza nagkanayon kini nga tungod sa kauwaw sa pasangil sa iyang silingan nga nakigrelasyon siya ni Lino Tinebo alyas "Agat" maong gahigkog siya.

Ang bana ni Tañeza didto magtrabaho sa Cagayan ug kagahapon lang kini mauli tungod sa maong hitabo.

Gibutyag usab ni Cortez nga usa ka electrical wire ang gigamit sa paghigot ni Tañeza sa iyang liog nga diha gikutay ang tumoy sa beam sa payag.