Amahan, anak gitigbas, usa patay

Patay ang usa ka amahan samtang naangol ang anak nga ulitawo human sila tigbasa sa duha ka mga batan-on.

Ang insidenti nahitabo niadtong Lunes sa kadlawon sa sityo Paril, barangay Talavera, dakbayan sa Toledo.

Ang namatay mao si Primitivo Elquinto, 70, minyo samtang ang iyang anak nga si Benedicto Elquinto, 26, ulitawo ang nakaangkon usab og samad tinigbasan sa iyang agtang.

Base sa imbestigasyon sa desk officer sa kapolisan sa dakbayan sa Toledo, SPO1 Carlo Canseco, nga niadtong Domingo sa gabii, niadto sa balay ni Condrado Manghino ang amahan ug anak.

Nahitabo ang panag-inom ug nagkuting-kuting sa gitara si Primitivo samtang ang ubang gikainom ang nanayaw.

Maoy namatikdan ni Benedicto nga ningreklamo ang anak sa tagbalay nga si Randy Manghino, 24, ulitawo, kay gisabaan sa gitara.

Alas 12 na sa tungang gabii giagda na sa pag-uli ni Benedicto ang iyang amahan apan dihang nakalakaw na sila pipila ka metros pa ang gilay-on, gigukod sila ni Randy ug sa barkada niini nga usa ka Jopit Lombrino, 24, ulitawo dayong gitagsaan sila sa pagtigbas ginamit ang sundang.

Unang naigo si Benedicto sa iyang agtang sa dihang gitigbas siya ni Lombrino apan dili kaayo dako ang samad hinungdan nga siya nakadagan.

Sunod nga gitigbas ni Randy mao si Primitivo diin maayong pagkaigo sa bukobuko ug ulo niini.

Gitabang pa si Primitivo sa iyang mga kaliwat apan nakabsan gyud kini sa iyang kinabuhi suma pa ni Canseco.

Nagduda si Canseco nga may dumot na ang mga biktima ug mga suspek bisan pa sa pagpanghimakak ni Benedicto nga sila may kontra sa ilang lugar.

Gibutyag ni Canseco nga may mga kaso na sila sa tinigbasay sa nahisgutang lugar diin ang nalambigit kabanay ra sa mga biktima ug sa suspek.

Sa pito ka tawo nga gipatawag sa kapolisan, sila si Randy Manghino ug Jopit Lombrino lang ang gipasakaan og kaso sumala pa ni Canseco. - Gregg M. Rubio