NADSU molusad og strike karong Miyerkules

Nasabtan sa mga drayber sa Nagkahiusang Drayber sa Sugbo (NADSU) nga way epekto ang ilang welga karong Miyerkules kay dili kini makaparalisar sa dagan sa mga sakyanan.

Apan matud pa ni Antonio Pogado, ang Presidente sa NADSU nga mao lamang kini pagpahinumdom sa kagamhanan sa nag-ungot nga kawsa nilang mga drayber sa pagtangtang sa balaod bahin sa oil deregulation.

Apan mibahad siya nga kon dili mosaler ang ilang ginagmay nga welga sa pagkakaron uban sa mga mamumuo, anha na maamguhi sa gobyerno ang epekto sa ilang welga sa panahong ipalapad nila kini sa tibuok nasud sa dili madugay.

Hinuon wala pa siya mohisgot og tukmang petsa apan matud pa ni Pogado nga angayan kining pangandaman sa kagamhanan.

Ang padayong pagsaka sa presyo sa asayte, maoy gatilyo aron ang sektor sa transportation maningil usab og tubo sa plitehan.

Ang gikinahanglang "adjustment" subay sa hustong mga lagda maoy importante kaayo sa mga drayber sa sakyanang pasaheroan.

Apan kon may mahimo ang gobyerno nga mapugngan ang pagsaka sa mga presyo ning maong sugnod sa mga behikulong de motor, angayan kining buhaton sa kagamhanan matud pa ni Pogado.

Iyang gipasabot nga dili sila gustong magpunay og pangayo nga umentohan ang plite sa mga sakyanan tungod kay sakit kaayo kining bation sa mga sumasakay.